Enforcement Directorate (ED) chuan nimin zing khan Delhi sorkarin liquor excise policy a siam kaihhnawihah Aam Aadmi Party (AAP) hruaitu Rajya Sabha MP Sanjay Singh thawhpui pahnihte chenna in leh office an dap. 
Sanjay Singh chuan a thawhpuite chenna in leh office dap a nih chungchang hi sawiin, Modi-a dictatorship chuan a vawrtawp a thleng chho mek a ni, a ti. Delhi sorkar chuan excise policy hi a titawp tawh a, he policy kalpui a nih danah thil fel tawk lo awm nia sawiin, ED chuan Delhi deputy chief minister hlui, AAP hruaitu Manish Sisodia chu an lo man tawh bawk a, Tihar jail-ah a tang mek a ni. 
Singh chuan ED-te chetdan hi a twitter-ah tarlangin, "Modi-a'n midangte a rikrap leh tihduhdahna chuan a vawrtawp a thleng chho a ni. Modi-a dictatorship hi ka bei let zel ang. ED-ten dawt hmanga an thil chhui vel dan hi khawvel hriata pholan a ni tawh. ED pawhin an tihsual hi an pawm a, ka in an dap ṭumin engmah an hmu lo a, tunah ka thawhpui Ajit Tyagi leh Sarvesh Mishra-te an dap zui ve leh a ni," tiin Sarvesh-a pa chu cancer natna avanga enkawl a nih thu a sawi lang bawk. 
ED hian a hmain Delhi liquor policy chungchanga chargesheet thehluha Sanjay Singh hming ziah tel chu tihsual palh a nih thu an lo sawi tawh a, hei vang hian AAP pawhin a hming tihchhiatsaka puhin ED hi defamation notice pawh an lo pe tawh a ni.