Kum 3 chhung atan Rahul Gandhi-a regular passport pek remti

Delhi court chuan Congress party hruaitu, Rahul Gandhi chu kum thum chhung atan passport pangngai, regular passport pek a remti.

Rahul Gandhi hian defamation case-a thiam loh chantir a nih hnua Parliament member a nihna hlihsak a nih hnuah, MP a nihna anga diplomat passport a neih chu thuneitute hnenah thehlutin, passport pangngai a dil theihna turin court-ah hian no-objection certificate (NOC) a dil a ni.

Nimin khan Rouse Avenue Court chuan Gandhi dilna hi ngaihtuahin, kum 10 atana a dilna chu kum thum atan a phalsak a ni. Kum thum hnuah Gandhi hian passport dilna turin court-ah NOC hi a dil ṭhat leh a ngai ang.

Congress president hlui hi National Herald case-ah dik taka sum hmu leh, fund tichingpena puh zingah a tel a, hei vang hian passport a dilnaah hian court aṭangin NOC a neih phawt a ngai a ni. National Herald case hi BJP hruaitu Subramanian Swamy-a'n complaint thehluh behchhana siam a ni.

Gandhi-a'n NOC a dil hi a laka thubuai thehluttu, BJP hruaitu Swamy chuan a dodal a, ram pawna zinchhuah phalsak a nih chuan thubuai chhui mek hi a tibahlah thei niin a sawi. Mahse addition chief metropolitan magistrate Vaibhav Mehta chuan, zin chhuahna tura dikna chanvo neih chu fundamental right a ni tiin, court chuan Congress hruaitu tei velna turah hian khuahkhirhna a lo siamsak thei lo tih a sawi a, Swamy-a'n a lo dodalna chu a hnawlsak.