SC-in AAP hruaitu Satyendar Jain bail-in chhuah tir

Supreme Court chuan Tihar jail-a tang mek, Delhi minister hlui leh Aam Aadmi Party (AAP) hruaitu Satyendar Jain chu a hriselna ṭhat loh avangin nimin khan kar ruk chhung interim bail-in a chhuah tir.

Thawhṭanni khan spinal injury vangin Jain hi Safdarjung Hospital-ah a lo inentir tawh bawk. Hemi hnu hian a tanna, Tihar jail-ah a taksa chak loh vangin luhaiin a tlu a, Lok Nayak Jai Prakash Narayan (LNJP) Hospital-ah kalpui nghal niin ICU-ah dah a ni.

AAP hruaitu hi company kaltlanga sum dik tawk loa lalut leh, dan loa sum a hmuh hmanga ram leiah puh a ni. Nikum May thlaah Enforcement Directorate-in manin, Tihar jail-ah a tang a ni. Mahse Jain chuan an puhnate hi thu dik lo a nih thu leh, politics kaihhnawih thila an beihna niin a sawi thung.

Jain hi Delhi chief minister, Arvind Kejriwal-a cabinet member pawimawh tak ni ṭhiin, portfolio hrang hrang - health, home leh urban development-te a enkawl hman a ni. Man a nih hnuah, kumin January thla khan minister a nihna aṭang hian a bang a ni.