Parliament building thar hawn a ni ta; Hawnna inkhawmah eptu party 20 an tel lo
Prime minister Narendra Modi chuan nimin khan Parliament building thar a hawng ta. Building thar hawnna inkhawmah hian party 25 aiawhte an tel. Hetih lai hian President aia Prime Minister hawn tir a nih avanga lungawi loin, eptu party 20-te erawh chuan building thar hawnna inkhawm hi an boycott thung.
Prime Minister chuan Parliament building thar chu in a ni ringawt a, India mipui vaibelchhe 140-te beiseina lantirna a ni, a ti. Kawng hrang hranga India-in hma a sawn zel thu sawiin, "Parliament building thar pawh hi Aatmanirbhar Bharat (self-reliant India) bul ṭanna lantirna niin, Viksit Bharat (developed India) siam tura kan zinkawng zawh min hriatpuitu tur a ni," a ti.
PM Modi hian Parliament thar a hawn hnuah, thuneihna inhlanchhawnna chhinchhiahna nia sawi, 'Sengol' sceptre chu Lok Sabha chamber-a Speaker chair bulah a dah bawk. He sengol hi Adheenams-ten PM hnenah hian an hlan a ni.
Parliament building thar hawn leh, India zalenna kum 75-na lawmna pualin, Prime Minister chuan Rs 75 thir leh postage stamp a tlangzarh nghal bawk.
Building thar hawn dawn hian Vidic ritual hmangin puja neih a ni a, darkar khat dawn a awh. Rajya Saba deputy chairman Harivansh chuan president Droupadi Murmu leh vice president Jagdeep Dhankar-te thuchah a chhiar chhuak bawk a ni.
Parliament building thar hi
- Kilthuma neia sak niin, chhawng lia sang a ni
- A in sakna ram hi square meter 65,000-a zau a ni
- Modern technology hman a nih bakah, Parliament hlui aiin a let thumin a zau
- Kum 2.5 chhungin sak zawh a ni
- Building thar saknaah thawktu 60,000 vel chhawr an ni hman
- Building thar sakna atan hian Rs vbc 970 ruahman a ni
- Lok Sabha Speaker chair bulah thuneihna chhinchhiahna, Sengol dah a ni
- MP-ten joint session an neihna tur, Central Hall-ah hian MP 1,272 an leng. (Building hmasa aiin 500 chuangin an leng hnem thei zawk)
- Lok Sabha hall chu national bird, peacock theme hmanga siam niin, seat 888 a awm.
- Rajya Sabha hall chu national flower, lotus theme hmanga siam niin, seat 384 a awm.
- Complex thar hi Tata Projects Ltd sak a ni
- Grand Constitution hall chu India democractic heritage pholanna tur a ni
- Building hian main gate pathum - Gyan Dwar, Shakti Dwar leh Karma Dwar a nei
- Library, committee room eng emaw zat leh dining area changtlung tak a awm
- Parliament member-te chawlh hahdamna tur lounge siam a ni a, office hmun changkang tak tak dah a ni
Parliament bulding hlui museum-ah hmang dawn
Parliament thar hawn a nih hnu hian building hlui chu engatana hman tur nge tih zawhna pawh a tam hle. Sorkar laipui chuan India rama democracy lo indin chhoh dan pholanna turin, museum-ah hman a tum nia sawi a ni a ,mahse hemi chungchangah hian official-a thuchhuah engmah a la awm lo.
Kum 2021 March thla khan union housing and urban affairs minister Hardeep Singh chuan Rajya Sabha-ah Parliament building thar peihfel a nih hunah, building hlui hi ṭhiat loin thuam ṭhat a ni dawn tih a sawi. A hmanna tur tak erawh sawilang lo mah se, ram tana rohlu a nih avangin a building hi vawnṭhat reng a ni dawn tih an sawi a ni.
Building hlui hi musuem-ah siam a nih chuan, kum tam tak ram roreltuten India ram tana thutlukna pawimawh tak tak an lo siamna, a changa thinrim taka an lo inhnial leh inaukhumna hmunte chu mipuiten a hmun ngeiah an tlawh thei dawn a, Lok Sabha leh Rajya Sabha chamber hluite pawh an tlawh thei dawn a ni.
Parliament building hlui hi a tirah chuan Council House tia sawi a ni a, British architect Sir Edwin Lytyens leh Herbert Baker-te design a ni. Kum ruk chhung sain, kum 1927 khan an sa zo a, kum 1956-ah chhawng hnih sak belh lehin, kum 2005 khan building chhungah hian Parliament Musuem siam a ni leh bawk.