Niti Aayog meeting-ah non-BJP CM 8 an tel lo

Prime minister Narendra Modi kaihhruaiin Inrinni liam ta khan Niti Aayog Council meeting neih a ni a, mahse meeting-ah hian non-BJP chief minister pariat an tel lo.

Centre-a rorellai, BJP leh eptu party-te chuan President aia Prime Minister-in Parliament building thar a hawng tur chu ram danpui kalh, democracy zah lohna lian tak nia sawiin an boycott a, hetih lai kara Niti Aayog meeting koh chu eptu CM-te chuan chhuanlam hrang hrang siamin a inlan ta lo a ni.

Punjab chief minister Bhagwant Mann chuan sorkar laipuiin Punjab a ngaihthah avangin, lungawi lohna lantir nan Niti Aayog meeting hi a boycott tih a sawi. Mann chuan meeting hi 'photo session ' ang vel chauh a ni tawh tiin, thil ngaihtuah tura an dahte chinfel a nih loh chuan meeting-a tel chu awmzia a awm lo a ni, a ti.

Delhi chief minister Arvind Kejriwal chuan sorkar laipuiin Delhi mipuiten an aiawh tura an thlan, AAP sorkar rahbeh tum a, Delhi LG kuta officer transfer leh posting chungchanga thuneihna a pek duh lohna lantirin, meeting hi a boycott tih a sawi bawk.

Rajasthan chief minister Ashok Gehlot chuan hriselna ṭhat tawk loh a chhuanlam a, Odisha chief minister Naveen Patnaik chuan programme duan sa a lo nei tih a sawi. Kerala CM Pinaryi Vijayan, Bihar CM Nitish Kumar leh Telangana CM K Chandrasekhar Rao-te pawh meeting-ah hian an inlan lo.