Jantar Mantar-ah wrestler-te nawrh phal a ni tawh lo : Delhi Police

Delhi police-te chuan hun rei tak lungawi lohna lantira nawrh huaihawt tawh, hmeichhe wrestler-te chu Jantar Mantar-ah nawrh an huaihawt phal a ni tawh lo tih an sawi.

Pathiannia Parliament building thar hawn a nih lai khan, wrestler-te hian lungawi lohna an lantirna kal zelah Parliment building panin kawng an zawh a, Delhi police-ten lo dangin nasa takin an innawrbuai zui a ni.

Police-te chuan wrestler-te nena an innawrbuai hnu hian, thla khat chuang zet nawrh huaihawta an lo awmna, Jantar Mantar chu thianfaiin, he hmunah hian wrestler-te hi an awm zui phalsak an ni tawh lo tih an sawi. Pathiannia buaina chhuakah mi 700-te hren an nih thu sawiin, a tam zawk erawh tlai lamah chhuah leh nghal an ni. Police-ten an hren zingah hian World Championship medallist Vinesh Phogat, Olympic medallist - Sakshi Malik leh Bajrang Punia-te an tel.

Wrestler-te hian BJP MP leh wrestling federation hotu, Brij Bhushan Sharan Singh chu hmeichhe wrestler eng emaw zat, kum tling lo pakhat pawh telin, chungah mipat hmeichhiat lam hawia mawi lo taka cheah an puh a ni. Hei vang hian Wrestling Federation of India president man leh, a nihna aṭanga ban an phut a, April 23 aṭang khan lungawi lohna hi an lantir tawh a ni. Hetih lai hian Singh chuan wrestler-te puhna hi thu dik lo tiin a pha thung.

Delhi special commissioner of police, Dependra Pathak chuan wrestler-te hi Jantar Mantar-a lungawi lohna an lantirna hmun turte pawh buatsaih sak a ni a, hetih lai hian dan bawhchhia a, buaina chawk chhuak zawnga an chet thu a sawi. Mahse wrestler-te chuan boruak ṭha tak hnuaiah, an thil phut nawrna atan Parliament building lama kawng zawh an tum chu police-te hian tharum hmangin an lo bei let nghal niin an sawi ve thung a ni.

Hmeichhe wrestler-te chunga Delhi police-te chet dan chu eptu pawl hrang hrang chuan an dem thu an sawi a, Nationalist Congress Party (NCP) hotu Sharad Pawad chuan union woman and child development minister Srmiti Irani chu heng hmeichhiate thlavang a hauh loh chhan a zawt let hial. Hmeichhiate humhalh leh an harsatna chinfel sak chu a mawhphurhna a ni tel tih sawiin, engvanga Rahul Gandhi beihna thu lam chauh nge sawichhuak ṭhin a ni tih a twitter kaltlangin a zawt.