Karnataka minister 32 zingah crorepati 31 an awm

Karnataka-a Congress sorkar thara minister 32 zingah 31 chu mi hausa tawntaw, crorepati an ni a, crimninal case nei lai 24 an awm bawk.

Association for Democratic Reforms (ADR)-in minister atana ruat tharte affidavit a zirchianna aṭanga report a tihchhuahah, minister 32-te hausakna hi chawhrualin mi pakhatin Rs vbc 119.06 hu zel nei ang an ni. Deputy chief minister DK Shivakumar chu hausa berin, a thil neih hlut zawng hi Rs vbc 1,413.80 a tling. Hetih lai hian minister zinga crorepati ni lo awmchhun, Timmapur Ramappa Balappa thil neih chu Rs nuai 58.56 hu a ni.

Cabinet minister 32 zingah hian hmeichhia pakhat, Laxmi R. Hebbalkar chauh a awm a, Rs vbc 18 hu a nei tih report chuan a tarlang.

Minister zinga paruk (19%) chu zirna lamah Class 8-12 inkar an ni a, 24 (75%) chu graduate leh a chunglam niin, pahnih chu diploma holder an ni. Miniser 18 (56%) chu kum 41-60 inkara upa niin, 14 (44%) chu kum 61-80 inkar an ni.

Inthlan result puan hnuah hun eng emaw chen chief minister post changtu tur tihfel theih loha a awm hnuah, central lama Congress party hruaitute rorel puina hnuaiah chief minister atan Siddaraimaah leh deputy chief minister Shivakumar-te chu ruat an ni. CM leh Dy CM bakah minister tur pariatte chu a hmain lakluh an lo ni tawh a, kar liam ta khan cabinet tilianin minister thar atan mi 24 laklut belh an ni leh bawk. Minister-te chanpual tur hi sem fel a la ni lo.