Rajasthan inthlanah Gehlot leh Pilot-ten lungrual taka thawhdun remti

Rajasthan-a Congress party hruaitu pahnih, chief minister Ashok Gehlot leh a deputy hlui, Sachin Pilot-te chuan an inkarah inhriatthiam lohna nei mah se, state assembly inthlan lo awm turah Congress party tan theihtawp chhuaha thawhdun an remti.

Thawhṭanni khan Congress president Mallikarjun Kharge hoin, Gehlot leh Pilot leh party hruaitu dangte chuan darkar li zet meeting an nei a, he hunah hian Rahul Gandhi pawh a tel a ni. Meeting zawh hnua chanchinthar lakhawmtute a kawmnaah, Congress general secretary KC Venugopal chuan, "Lungrual takin inthlan lo awm turah hian kan thawk dawn a, Rajasthan-ah hian hnehna kan chang ngei ang. Ashok Gehlot leh Sachin Pilot-te pawhin kan rawtna siamte pawh an remti ve ve a ni," a ti.

Karnataka assembly inthlanah Congress party hi hneh taka thlan tlin a ni a, hemi hnu hian assembly inthlan hmabak, Rajasthan lamah hnehna an chan leh ngei theihna turin an insawrbing ṭan leh mek a ni. Hetih lai hian Rajasthan-a Congress hruaitu pahnih, Gehlot leh Pilot-te hi thuneitu zawk nih inchuhin hun rei tak an inkar boruak hi a ṭha tawh lo a ni. Thla hmasa khan Pilot hian Rajasthan-a sorkar hmasa, BJP sorkar laia eirukna hrang hrang thleng laka action lak phutin ni khat nawrh a lo huaihawt tawh a, chief minister Gehlot chu thil dik lo titute chunga hremna lekkawh tura a intiamna ang tipuitling loah a puh a ni.

Thawhṭanni vek khan Congress hruaitute hian kumin kumtawp lama assembly inthlan neihna tur dang, Madhya Pradesh-a party hruaitute meeting an neihpui bawk. Rahul Gandhi chuan Karnataka-a hnehna an chan ang bawkin, Madhya Pradesh-ah pawh hnehna an chang leh dawn a, seat 150 an la thei dawn tih a sawi.