PM Modi kaihhruai BJP sorkarin kum 9 a tling

Prime minister Narendra Modi kaihhruai central-a BJP sorkar chuan nimin khan kum kua a tling. BJP chuan kum kua sorkarna an chelh lawmna pual hian nimin aṭang khan thla khat awh tur ramchhung hmun hrang hrangah programme buatsaih an tum.

Prime Minister chuan a twitter-ah kum kua sorkarna an chelh chhungin, thutlukna zawng zawngte chu ram mipuite tana ṭha tura ngaihtuahna siam a ni tih sawiin, mipuite chungah lawmthu a sawi bawk. India ram hmasawnna turin nasa zawkin an thawk zel dawn tih a sawi.

Modi hian vawiinah Rajasthan-a Ajmer-ah kum kua tlin lawmna puala rally buatsaihah thu a sawi ang. Thawhtṭanni khan union minister leh BJP chief minister-te chuan BJP sorkarin hmasawnna a thlen dan leh hlawhtlinna a neih hrang hrangte mipuite an hriattir bawk. PM Modi kaihhruaina hnuaia India ramin hma a sawn dante an puangzar hlawm a ni.

Kum 2014 Lok Sabha inthlanpuiah hian BJP kaihhruai sorkar a ding a, kum 2019 inthlanpuiah thlan tlin an ni leh bawk. Modi hi kum 2014, May 26 khan India ram prime minister atan lakluh a ni a; kum 2019, May 30-ah a term hnihna atan lakluh a ni leh. India Prime Minister dinhmun chelh rei thei palina leh, Congress party mi ni lo a, PM ni rei thei ber a ni mek. Modi aia PM dinhmun chelh rei theite chu Congress member vek - Jawaharlal Nehru, Indira Gandhi leh Manmohan Singh-te an ni.

Pathianni khan PM Modi kaihhruaiin kum 2024 Lok Sabha inthlanpui lo awm tur chungchang thlirin, BJP sorkarna state-a chief minister leh deputy chief minister-te chuan Delhi-ah party headquarters-ah meeting an nei. He meeting hi central-a BJP hruaituten an telpui bawk.