PM-in BJP sorkar kum 9 tlin lawmna 'Maha Jansampark' campaign a hawng

Prime minister Narendra Modi chuan central-a BJP-in sorkarna an chelh kum kua a tlin puala thla khat awh tura lawmna, 'Maha Jansampark' an buatsaih chu niin khan Rajasthan-a Ajmer-ah a hawng.

PM Modi chuan Ajmer-a public meeting-ah 'Maha Jasanmpark' hi nimin khan a khuhhawng a ni. He campaign hnuaiah hian BJP chuan nimin aṭanga June 30 thleng, ram chhung hmun hrang hrangah public programme an buatsaih dawn a, BJP sorkar hmalakna hrang hrang te, a hlawhtlinna neih hrang hrangte an puangzar ang.

'Maha Jansampark' campaign hi Lok Sabha constituency 543-ah neih tum a ni. Thla khat chhung hian hmun 500 chuangah public meeting buatsaihin, press conference pawh ṭum 600 chuang buatsaih tum a ni bawk.

BJP national general secretary, Tarun Chugh chuan an programme neih dan tur sawiin, "BJP hruaitu 288 leh party worker nuai 16-ten Lok Sabha bial zawng zawngah kum kua chhunga sorkar laipui hnathawh ṭhat leh hlawhtlinna a neih hrang hrangte mipuite hnenah an puangzar dawn a ni," tiin, party hruaitute hian Lok Sabha bial tinah chhungkaw 1,000 zel an kawm dawn a, anni bakah zirtirtu, social media influencer leh khawtlanga mi pawimawh dangte pawh seminar-te an neihpui bawk ang, a ti. June 25, Emergency Day-ah Lok Sabha bial tinah conference buatsaihin, Congress party-in democracy a tihchhiat dan documentary tihchhuah an tum bawk a ni.