UWW-in wrestler nawrh huaihawt mekte a thlawp; Ni 45 chhunga WFI hruaitu thlang ṭha turin hriattir

Amateur wresting-a international governing body, United World Wrestling (UWW) chuan Wrestling Federation of India (WFI) hotu laka lungawi lohna lantira nawrh huaihawt mek, India wrestler-te a thlawp thu sawiin, WFI chu thla khat chhunga hruaitu thar thlang turin a hriattir.

Indian wrestler-ah hian WFI hotu, BJP MP Brij Bhushan Sharan Singh chuan hmeichhe wrestler-te chunga mipat hmeichhiat lam hawia mawi lo taka cheah puhin, a chungah action lak phutin thla khat chuang nawrh an huaihawt tawh. Mawi lo taka a khawih zingah hian kum tling lo pakhat a tel tih an sawi bawk.

Pathiannia Parliament building thar hawn a nih ṭum khan, wrestler-te hian an lungawi lohna lantirna atan thla khat chuang nawrh an huaihawt tawhna, Delhi-a Jantar Mantar aṭangin Parliament building panin kawng an zawh a ni. Mahse Delhi police-te chuan lo dangin, nasa takin an innawr buai a, nawrh huaihawt zinga mi eng emaw zat chu an hreng zui bawk. Hemi hnu hian Delhi police-te chuan Jantar Mantar hi thian faiin, he hmunah hian wrestler-te chu an awm phalsak an ni tawh lo tih an sawi zui bawk a ni.

UWW chuan wrestler-te chunga thil thleng chungchangah Thawhlehni khan thuchhuah na tak siamin, nawrh huaihawt mek wrestler-te chunga thil thleng te, kawng an zawh avanga police-ten an man leh an hren zuite chu ngaihtuah zui a ngai hle tih a sawi. UWW chuan wrestler-te chunga thil thleng chu a dem takzet a, an thil phut chungchangah ngaihtuah ṭhat a ni lo chuan a tilawm lo hle tih a sawi. India ram thuneitute chu WFI hruaitu puh a nihna chungchanga chu hleih nei loa chhui chiang turin an phut bawk.

Thawhlehnia an thuchhuahah hian UWW chuan WFI chu hruaitu thar thlang turin ni 15 hun a pe a, hemi chhunga an inthlang ṭha lo a nih chuan Indian federation chu suspend a nih mai theih thu leh, Indian wrestler-te pawh neutral flag hnuaiah intihsiaknaah an tel mai tur thu a sawi.

Wrestler nawrh huaihawtte hian Jantar Mantar aṭanga hnawhchhuah an nih hnuah, WFI hotu man tura sorkar nawrna atan India tana an medal lo dawn tawhte chu Thawhlehni khan Ganga luiah paih an tum. Mahse farmer leader, Naresh Tikait a inrawlh hnuah an sorkar chu ni nga chhung an thil phut tihlawhtling turin hun an pe leh a ni.