India : Covid-19 kai hmuh chhuah tam ber ni

India rama Covid-19 hri leng chuan ziaawm lam a pan hlei thei lo a, Thawhlehni khan ram chhungah hri kai hmuh chhuah tam ber ni a thleng leh a, hri kai mi 5,611 an awm belh leh.

Thawhlehni vek khan he hri leng vanga thi hi mi 140 an awm a, India rama he hri vanga thi zawng zawng hi mi 3,303 an awm tling tawh a ni. Kai thar te nen hian India rama hri kai hmuhchhuah tawh hi mi 1,06,750 an tling tawh a ni.

Covid-19 kai enkawl dam hi ministry of health and family welfare chuan mi 42,298 an awm tawh tih a tarlang a, enkawl dam tawh recovery rate hi 39% a ni. Hri kai thar tamna state-te chu Maharashtra, Tamil Nadu leh Gujarat-te an ni. Maharashtra-ah hian hri kai thar mi 2,000 chuan an awm a, Tamil Nadu-ah mi 688 leh Gujarat-ah mi 395-te an awm. 

Maharashtra state chu hri kai tamna leh hri vanga thi tamna ber state a la ni chhunzawm zel a, hri kai hi mi 37,136 an tling tawh a, an zingah hian police 1,388 an tel. 

Health Minister Dr Harsh Vardhan chuan ram chhunga hri leng laka mipuite kan himna tur ṭha ber chu social distancing (inhnaiha awm loh) a nih thu sawiin, hei hi he hri laka invenna awmchhun a ni, a ti. India-in hri kaite a hriatchhuah tam theih nan ni khatah mi nuai khat test neihpui hman tum a nih tawh dawn thu leh, ram chhunga sorkar laboratory 373 leh private laboratory 152 hman a nih mek thu a sawi bawk.  

Indian Council of Medical Research (ICMR) chuan nimin zing dar 9 thleng khan sample 25,12,388 test a ni tawh tih a sawi. Thawhlehni zing dar 9 leh nimin zing dar 9 inkar khan sample 1,08,121 test hman a nih thu a sawi bawk.

u    Andhra Pradesh chuan sample 2,58,450 test tawhin, heng zinga 2,55,961 chu a negative. An state-ah hian hri kai hi 2,489 awmin mi 52 in an thihpui tawh. 

v    Kerala chuan sample  46,958 a test tawh a,an zinga 45,527 a negative. Covid-19 kai mi 643 an awm a, mi paliin an thihpui tawh a ni. 

w    Tamil Nadu chuan sample 3,48,174 test-in positive 12,448 an awm a, result nghah lai 887 an awm bawk. Hri kai zinga 84 chuan an thihpui tawh a ni. 

x     Karnataka-ah nimin thleng khan sample test tawh hi 1,58,599 an awm a, an zinga 1,395 chu an postive a ni. Hri kai enkawl dam 543 awmin, thihpui 40 an awm tawh. 

y    Maharashtra-ah sample 2,93,998 test a ni tawh a, positive 37,136 an awm. Hri kai zinga 1,325 in an thihpui a, mi 9,639 chu enkawl dam an ni tawh a ni.