WHO Executive Board chairman thar tur Harsh
Member 34 awmna World Health Organisation (WHO) Executive Board-a chairman ni turin union health minister Dr Harsh Vardhan chu ruat a ni a, May 22-ah a hna thar hi a zawm ang. Vardhan hian Japan mi Dr Hiroki Nakatani a thlak dawn a ni.
Thawhlehnia online video kaltlanga World Health Assembly neihah ram hrang hrang 194 aiawhte chuan Vardhan hi chairman turin an pawm a ni.WHO Executive Board chairman nihna hi kum khat zel atan a ni.
Kum tinin May thla hian World Health Assembly neih ṭhin a ni a, he assembly-ah hian kum 5 term Director-General thlan a nih ṭhin bakah kum 3 term WHO Executive Board member 34 te thlan an ni ṭhin. Executive board chuan WHO hmalakna thlir letna te a nei ṭhin a, he assembly-ah hian budget rawt a ni ṭhin bawk.
Vawiina zo tur World Health Assembly vawi 73-naah hian kum danga an tih ṭhin ang bawkin ram hrang hranga health minister-te an tel leh a ni. WHO supreme body, World Health Assembly-a WHO Executive Board member-te hi kum khatah vawi hnih tal an inhmukhawm ṭhin. He board hian Health Assembly-a thu rawtte leh policy duante chu hman leh hman loh tur an thilfim ṭhin a ni.