Loneitu pawlin wrestler-te thlawpna an lantir

Wrestling Federation of India (WFI) hotu Brij Bhushan Sharan Singh laka lungawi lohna lantira nawrh huaihawt mek, Indian wrestler-te thlawpna lantirin nimin khan loneitu pawl, Samyukt Kisan Morcha (SKM) chuan ram pum huap nawrh an huaihawt.

Ram chhunga loneitu pawl lian ber, SKM chuan mipat hmeichhiat lam hawia hmeichhe wrestler ṭhenkhat chunga mawi lo taka chetu, BJP MP Sharan Singh-a ban phuta wrestler-te nawrh huaihawt mek thlawpna an lantir tur thu Thawhlehni khan an lo sawi tawh a ni. Wrestler-ten an dikna chanvo an hmuh theihna turin an hmalaknaah an thlawp zel tur thu an sawi. Pawl dang hrang hrangte pawh Brij Bhusan man phuta sorkar nawr turin an ngen bawk.

SKM-ten nawrh an huaihawt dawn vang hian Delhi border point-ahte venhimna tihkhauh a ni a, boruak ṭha lo a thlen lohna turin police tam zawk duty tir an ni tih Delhi police official-te chuan an sawi. State ṭhenawm aṭanga motor lutte chu border-ah uluk taka endik vek an ni bawk.

Wrestler-te hian kumin January thla aṭang khan Singh man phutin sorkar an nawr tawh a, April 23 aṭangin Delhi-a Jantar Mantar-ah sit-in protest an nei bawk. Mahse Pathianni khan Delhi police-te chuan Jantar Mantar aṭang hian hnawtchhuakin, he hmunah hian wrestler-te chu nawrh an huaihawt phalsak a ni tawh lo tih an sawi.

Hetih lai hian WFI hotu Brij Bhushan Sharan Singh chuan wrestler-ten a puhnate chu thu dik lo niin a sawi thung a, an puhna finfiahna an nei a nih chuan a inawkhlum ang tiin a sawi. Court-ah wrestler-te hian finfiahna an pe thei a nih chuan, eng hremna pawh hmachhawn a inhuam thu a sawi a ni.