June 12-a eptu pawl inhmuhkhawmnaah party 16-in an tel tur thu tichiang tawh

Kum 2024 Lok Sabha inthlanpui tur atana eptu ṭangrual pawl siam tura hmalakna kal zelah, June 12 hian a vawi khatna atan Opposition meeting neih an tum. Party 16 chuan meeting-ah hian an tel tur thu an tichiang tawh a ni.

Janata Dal (United) leh Bihar chief minister, Nitish Kumar hmalaknaa eptu pawl inhmuhkhawm neih turah hian Congress president Mallikarjun Kharge leh president hlui Rahul Gandhi-te erawh an tel hman lo maithei niin Congress party chuan a sawi. An hruaitute theih huna meeting neih hun tur hi sawn duh mah se, party hrang hrangte hman hun a rual loh avangin, a hmaa ruahman lawk anga kalpui mai turin an ti a, Kharge leh Gandhi-te an tel hman loh pawhin, an party aiawh tur an tirh ngei tur thu an sawi.

Opposition meeting neih tura an tel tur thu tichiang tawh zingah hian West Bengal chief minister Mamata Banerjee leh Trinamool Congress hruaitu Abhishek Banerjee, Delhi chief minister Arvind Kejriwal, Maharashtra chief minister hlui Uddhav Thackeray leh National Congress Party (NCP) hruaitu Sharad Pawar-te pawh an tel.

Meeting-ah hian eptu pawlte hian 2024 inthlanpuiah BJP paihthlak a nih ngei theihna atan, Lok Sabha seat tinah BJP khing tur common candidate dah chungchangte an sawiho ang.