Ramri buaina chungchangah India leh China aiawhte inbia

China leh India chuan Ladakh khawchhak lama Line of Actual Control (LAC)-a ram pahnihten buaina an neih chungchang chinfel dan ngaihtuahin, Nilaini khan Delhi-ah inbiakna an nei leh.

Ministry of External Affairs (MEA) chuan ram pahnihte hian border area-a boruak muanawm a awm theihna turin, high-level military neih leh thuai an remtih thu sawiin, hei hi inbiak an neih ṭum 19-na tur a ni ang.

Eastern Ladakh-ah hian India leh China sipaite hi kum thum chuang zet an intibuai tawh a, ram palai leh sipai hotute pawh ṭum eng emaw zat inbe tawhin, an buaina hmun ṭhenkhat aṭangin an sipaite pawh an hnukkir ve ve tawh bawk.

MEA chuan Delhi-a inbiakna neihah hian, India-China border area-a Western Sector-a LAC chungchangte sawiho a ni tih tarlangin, boruak ṭha tak hnuaia hma lak dan tur rawtnate pawh an siam tih a sawi. Border area-a boruak muanawm siam chuan ram pahnihte inlaichinna pawh a tiṭha dawn a ni, a ti.

Delhi-a meeting neihah hian India aiawhte chu MEA-a Joint Secretary (East Asia)-in a ho a, China lam aiawhte chu Chinese Ministry of Foreign Affairs-a Boundary and Oceanic Affairs Department-a Director General-in a ho a ni.