Ahmednagar hming ‘Ahilyanagar’ tiin thlak a ni thuai dawn : Maha CM

Maharashtra chief minister Eknath Shinde chuan Ahmednagar district chu ‘Ahilyanagar' tiin a hming thlak a ni dawn tih a sawi.

CM Shinde chuan Nilainia Ahilyadevi Holkar piancham vawi 298-na puala thu a sawiah, Maharashtra state tana a hnathawh ropui tak hriatrengna atan Ahmednagar district hming chu a hming chawiin, Ahilaynagar tia thlak a nih tur thu a sawi.

Ahilyadevi Holkar hi Ahmednagar district-a Chondi khuaa piang a ni a, Muslim-te lak aṭangin Hindu temple tam tak a humhim a , Muslim-te tihchhiat temple pawh eng emaw zat a sa ṭha leh niin an sawi. A piancham pual hian state sorkar chuan State Govenment Medical College of Baramati chu Punyashlok Ahilyadevi Holkar Government Medical College, Baramati tiin a thlak bawk a ni.

BJP hruaitu Gopichand Padalkar chuan tualchhung miten district hming thlak hi hun rei tak an lo ngen tawh tih a sawi. Maharashtra-a Shiv Sena party, Shinde lamṭang pawl leh BJP-ten ṭangrual sorkar an din hnuah, Aurangabad chu Chhatrapati Shambaji Nagar leh, Osamanabad chu Dharashiv tiin an lo thlak tawh bawk.