Hri kai hmuh chhuah thar sing ruk chuang India ramah 'case' nuai 20 chuang awm tawh

Covid-19 hripui lengin India ramah zual lam a pan zel a, nimin khan hri kai hmuh chhuah thar mi sing ruk chuang an awm avangin India ram pumah hri kai nuai 20 chuang an awm tawh a, enkawl dam nuai 13 chuang an awm tawh bawk a ni.

Ministry of Health and Family Welfare-in nimina report a tihchhuahah hri kai hmuh chhuah thar mi 62,538 an awm a, hei hi ni khata hmuh chhuah tam ber ni a nih leh a, mi sing ruk chuang hmuh chhuah thar awm ṭum khatna a ni bawk. Hengte nen hian hri kai hmuh chhuah hi  mi 20,27,074 an ni tawh. 

Hetih lai hian enkawl dam an pung ve zel a, nimin report-ah ringawt hian dama puan mi 49,769 awm lehin hri kai tawh aṭang hian mi 13,78,105 chu an dam leh tawh. Thihpui 886 awm belh leh bawkin mi 41,585-in an thihpui tawh a, hri kai mek 6,07,384 an la awm a ni. Enkawl dam tawh rate pawh a sang ve sawt hle a, 67.98% niin thihpui rate hi 2.05% a ni thung. 

Indian Council of Medical resaerch (ICMR) chuan nimina report an tihchhuahah chuan darkar 24 chhungin Covid-19 sample 6,39,042 an enfiah leh tih an tarlang a, hri len ṭantirh aṭanga nimin thleng khan sample 2,27,88,393 an test tawh. 

ICMR hian laboratory pawmpui 1383 a nei tawh a, heng zinga 931 hi sorkar laboratory niin 452 hi chu private laboratory a ni thung.

Sorkar laipui chuan hripui leng kaihhnawih data lakkhawmna tur National Clinical Registry for Covid-19 tlangzarh a tum. Hemi hnuaiah hian real time clinical data lakkhawm a ni dawn a, chumi hmang chuan 'evidence' behchhanin clinical practice, research, guideline leh policy-te an siam an tum a ni. 

Ministry of Health and Family Welfare, Indian Council of Medical Research (ICMR) leh All India Institute of Medi­cal Sciences-te rawtna angin National Clinical Registry for Covid-19 hi siam tum a ni a, ramchhung hmun hrang hranga damdawi-in 100 vel aṭangin data an lakhawm ang. 

 

Darkar 24 chhunga thil thlen dan -

Kai hmuh chhuah thar    :     62,538

Dama puan thar    :     49,769

Thihpui    :     886

Hri len ṭantirh aṭanga nimin thleng -

Hri kai tawh zat    :      20,27,074

Dam tawh    :     13,78,105

Thihpui    :     41,585

Kai mek    :     6,07,384