WFI hotu Maha rally buatsaih turah phalna pe duh lo

Uttar Pradesh-a Ayodhya district thuneitute chuan BJP MP leh Wrestling Federation of India (WFI) hotu, Brij Bhushan Sharan Singh-a'n June 5-a 'Jan Chetna Maharally' rally a buatsaih turah phalna an pe duh lo.

WFI hotu Singh hi hmeichhe wrestler ṭhenkhat chungah mipat hmeichhiat lam hawia mawi lo taka chea puh a ni a, a nihna aṭanga ban leh a chunga action lak phutin thla khat chuang wrestler-ten nawrh an huaihawt tawh a ni.

Circle officer (Ayodhya) SP Gautam chuan June 5 hi World Enviroment Day a ni a, hemi ni hian programme dangte a awm avangin, Singh-a aiawha rally neih phalna diltu, BJP councillor Chamela Devi dilna chu an hnawlsak tih a sawi.

District thuneituten an dilna an hnawlsak hnuah, Singh chuan rally neih tum chu wrestler-ten an puhna chungchang police-ten an chhui mek avangin a sawn hlat a ni tiin a Facebook-ah a tarlang. Singh hi Uttar Pradesh-a Kaiserganj BJP MP nilai a ni.

Hetih lai hian Delhi police-te chuan hmeichhe wrestler pasarihte complaint thehluh aṭangin, Brij Bushan Singh lakah FIR pahnih an ziak lut. FIR hmasa zawk hi kum tlinglo chunga mawi lo taka chea puh a nih chungchang niin, Protection of Children from Sexual Offences (POCSO) Act hnuaiah ziahluh a ni. FIR pakhat dang hi hmeichhe wrestler-ten an zahawmna tibawrhbang zawnga chea puha complaint an thehluh vanga ziahluh a ni bawk. Mipat hmeichhiat lam hawia mawi lo taka che puh a nih bakah, Singh hi professional-te tana harsatna siamsak ṭhina puh a ni bawk.

Singh chuan wrestler-ten an puhna hi a pha thung a, dik lo taka chea an puhna hi finfiahna an neih chuan inawhhlum a hnial loh thu a sawi. A dik lohna lantirna tur court-ah an pe thei a nih chuan, eng ang hremna pawh hmachhawn a inhuam thu a sawi a ni.