Congress-in defence ministry zawhna zawt

Defence ministry website-a document chu Ningani khan paih a ni a, hemi chungchangah hian Congress chuan ministry hnenah a paih chhan a zawt. 

He document-ah hian May thlaa Ladakh chhak lama Line of Actual Control (LAC)-a China sipai inbawrkhawm chungchang ziah lan a ni. Website aṭanga lakthlak a nih chhan hi Congress chuan zawtin, eng vanga paih emaw la bo nge an nih tih leh an thil paih avang hian thudik chu a bo dawn chuan lo tih an sawi a ni. 

June thla khan China sipaite chu LAC hnaiha an la awm ṭeuh thu te, India security tiderthawng zawnga India hnaih lama China sipai an bawrkhawm thute chu document an paih takah chuan a inziak tih Congress chuan an tarlang bawk. Hemi chungchangah hian Rahul Gandhi chuan sorkar a dem thu leh China-in LAC-a buaina an siam chu sorkar chuan theihnghilh a tum ta em ni, a ti. 

Congress thupuangtu Ajay Maken chuan mipuite hnena thudik sawi turin sorkar a phut thu a sawi. Defence ministry-in thla tina report (documentary) a siam paih a nih tak danah hian India ramri chhungah hian China sipai chu an lut ngei a ni tih a chiang, tiin Maken chuan a sawi. Maken chuan China chungchangah PM Modi sorkar chuan engtin nge hma a lak zel dawn tih a zawt nghal bawk.