Odisha rel chesuala thi zat 288 an tling

Odisha state-a rel chetsualna rapthlak tak thlenga thi chu mi 288 an tling tawh a, mi 803 velin hliam an tuar. Kar liam ta Zirtawpnia chetsualna thleng hi tun kum zabi hman mek chhunga India rama rel chetsualna thleng rapthlak ber nia sawi a ni.

Balasore district-a Bahanaga Bazar Station-a rel pathum insute hi khualzin phur rel pahnih, Bengaluru-Howrah Superfast Express, Shalimar-Chennai Central Coromandel Express leh bungraw phur rel pakhat an ni. Khualzin phur rel pahnihah hian mi 3,400 chuang an chuang tih railway official-te chuan an sawi.

Rel chetsualna thlenna hmunah hian chhanchhuah hna thawk turin national disaster response force (NDRF) team pasarih, Odisha disaster rapid action force (ODRAF) unit panga leh fire service leh emergency unit 24 tirh nghal an ni. Indian air force (IAF) pawhin thi leh hliamte phurhna turin Mi-17 helicopter a tir bawk.

Prime minister Narendra Modi chuan Inrinni khan rel chetsualna hmun hi a tlawh a, vanduaina thleng chu pawi a ti takzet tih sawiin, damdawiina hliam tuarte a tlawh nghal. Chetsualna thlengah mawhphurtu an awm a nih chuan, sorkar laipui chuan na takin an chungah hremna a lekkawh ngei dawn a ni, a ti. Union health minister pawhin Odisha hi tlawhin, hliam tuarte enkawlna damdawi-in hrang hrangte a tlawhkual bawk.

Balasore district-a rel pathum insu a, chetsualna rapthlak tak thlen chhan hi chhui nghal a ni a, preliminary report-ah chuan signal lam dik loh vanga chetsualna thleng nia tarlan a nih thu South Eastern Railway-a chief public relations officer KS Anand chuan a sawi. He thila mawphurtute pawh hriat an ni tawh nia sawi a ni bawk a, mahse report kimchang erawh thehluh a la ni lo.

Union minister of state for tribal affairs Bishweswar Tudu chuan rel chesuala chuang khualzinte chu an state lamah ṭheuh him taka thawn haw vek an nih hma chuan, amah bakah union minister dang pahnih, railways minister Ashiwini Vaishnaw leh education minister Dharmendra Pradhan-te chu Odisha state-ah an inkhuar dawn tih a sawi.

Chetsualna thleng vanga rel kawng chhiate chu ngawrh taka siam nghal niin, nimin khan a main line chu siamṭhat a ni tawh tih Railway Minister chuan a sawi.

Railway Minister chuan rel chesuala thi chhungte hnena zangnadawmna, Rs nuai 10 ṭheuh leh, hliam na zualte hnena Rs nuai 2 leh hliam tenaute hnenah Rs 50,000 ṭheuh pek a ni tur thu a puang a. PM Modi pawhin PM National Relief Fund (PMNRF) aṭangin thi chhungte hnenah Rs nuai 2 leh hliam tuarte hnenah Rs 50,000 ṭheuh pek an ni dawn tih a puang bawk a ni.