Sorkarin cocktail drugs 14 hralhchhuah a khap

Sorkar laipui chuan fixed-dose combination (FDC) drugs 14 chu hralhchhuah a khap.

Expert committee-in heng damdawite hi zirchianna mumal tak awm lo leh, mihringte hriselna atana pawi palh thei nia an sawi avangin, sorkar chuan khapna thupek hi a tichhuak. Health Ministry-in thuchhuah a siamah, FDC drugs 14-te hi Drug and Cosmetics Act , 1940-a section 26A hnuaiha siam, hralh leh semchhuah khap a ni, a ti.

FDC-te hi active drugs ingredient chi khat emaw a aia tam emaw awmna a ni a, natna bik enkawlna atan hman an ni.

Sorkarin FDC drugs a khap zingah hian ha na, beng na, ruh chuktuah na, lu na leh tai na bakah, khawsika nachhawkna atana hman, Nimesulide + Paracetamol a tel. Hei bakah hian Amoxicillin+ Bromhexine, chlorpheniramine maleate leh codeine bakah hritlang khuhro damdawi atana hman fo, bromhexine, dextromethorphan leh ammonium chloride inpawlh chu a khap bawk.