Rs vbc 1,710 senga siam Bihar lei a chim

Bihar-a Ganga lui chunga cheng vaibelchhe 1,710 senga siam mek, four-lane Sultanganj-Aguani Ghat bridge chu Pathianni tlai khan a chim.

Sultanganj, Bhagal­pur leh Khagaria inkalpawhna lei-a pillar eng emaw zata slab 30 vel chu a chim ni a sawi a ni a, a chim zingah hian pillar no. 9, 10 leh 11 an tel.

He lei dawh lai hi a chim ṭum hnihna a ni. Kum 2022, April thla khan pillar 4, 5 leh 6 structure a lo chim tawh bawk. Hemi ṭum hian cable thawl chu a chim chhan nia sawi a ni a, mahse mi tam tak chuan hna thawh ṭhat tawk loh vang niin an sawi thung.

Chief minister Nitish Kumar chuan lei chim dan chu chhui chiang turin thupek a tichhuak nghal a, Additional Chief Secretary, Pratyaya Amrit hnenah he chhiatna thlenga mawhphurtute chu zawng chhuak a, na taka action la turin a hrilh.

CM Kumar chuan kum 2014, February ni 23 khan lei dawhna tur lungphum hi a phum a. Kum 2020, March thlaa zawh tura ruahman ni mah se, kum thum chuang zet tihkhawtlai a ni tawh. Dawh zawh a nih hmain ṭum hnih a chim hman ta a ni.