Amit Shah-a'n a chenna inah wrestler-te a kawm

Union home minister Amit Shah chuan nawrh huaihawt mek, Wrestler-te chu kar liam ta Inrinni zan khan New Delhi-a a official residence-ah a kawm. Hetih lai hian Ministry of Home Affairs chuan meeting hi a awm lo niin a sawi thung.

Loneitu pawl, Bharatiya Kisan Union hruaitu, Rakesh Tikait chuan wrestler-te hian Wrestling Federation of India (WFI) chief Brij Bhushan Sharan Singh laka an lungawi lohna lantir mekah, an thil phutte tihlawhtling tura nawr turin President leh Home Minister hmuh an tum thu hi June 1 khan a lo sawi tawh a ni.

June ni 3 zanah khan wrestler leh an coach-te chuan Amit Shah hi hmuin, darkar hnih vel meeting an nei ni a sawi a ni. Mipat hmeichhiat lam hawia hmeichhe Wrestler ṭhenkhat chunga awm lo taka chea an puh, WFI hotu hi ban turin an phut a, a chet dan chu hleih nei loa chhui chian an phut bawk. Home Minister chuan chhui mek a nih thu leh, hei hi ring ngam tura ngenin, dan ang takin thil kalpui a ni dawn tih a lo hrilh.

Wrestler-te chuan an laka F.I.R. thehluhte pawh hnuk dawk turin Home Minister hi an phut bawk. Parliament building thar hawn ni-a Parliament lam pana kawng an zawh ṭum khan buaina siama puhin an lakah F.I.R. hi thehluh a ni.

Brij Singh-a chi leh kuangte reng reng chu wrestling federation huanga teltir tawh lo turin Wrestler-te chuan an ngen. Hming hliauna nei lo, wrestling lama tawn hriat nei ngei chu wrestling federation hotu atana dah a, hmeichhia ni thei ngei se an duh thu an sawi bawk. Wrestler-te hian Home Minister hi meeting neihpui leh an la tum a ni.