Odisha rel chet sualnaa thi zinga 101 te la hriat theih loh

Odisha state-a rel chet sualna rapthlak tak thlenga thi zinga mi 101-te ruang chu tunge an ni tih hriat chian an la ni lo.

June ni 2-a Balasore district-a khualzin phur rel pahnih,Shalimar-Chennai Coromandel Express, Benagluru-Howrah Superfast Express leh bungraw phur rel insutnaah mi 278 an thi a, mi 1,000 chuang an hliam a ni. Ruangte hi endik niin, an zinga ruang 101 lai chu an nihna hriat a la nih loh thu Eastern Central Railway Divisional Railway Manager, Rinkesh Roy chuan a sawi.

"He rel chetsualnaah hian mi 1,100- in hliam tuarin, chung zinga mi 900- te chu damdawi in aṭanga chhuahtir leh tawh an ni a, mi 200-te chu state chhunga damdawi in hrang hrangah enkawl mek an ni. Mitthi 278 zinga mi 101- te erawh an nihna kan la hre thei lo thung" a ti.

Bhubaneswar Municipal Corporation Commissioner, Vijay Amrit Kulange chuan, "Bhubaneswar-a ruang 193 kan kawl zingah, ruang 80 chu tute nge an nih hriat a ni tawh a, chung zinga 55- te chu an chhungte'n an la tawh a ni. BMC helpline, 1929 kaltlangin call 200 chuang kan dawng tawh a, ruangte chu an chhungte hnenah kan pe mek zel bawk a ni", tiin a sawi.

Odisha rel chet sualna hian ram pum a nghawng a, Railway Board-in he chetsualna thlen dan chhui hna hi central agency kuta dah a rawt hnuah, Central Bureau of Investigation (CBI) kuta hlan a ni a, CBI team hian Balasore pawh an thleng tawh a ni. Inrinni liam ta khan Prime Minister Narendra Modi pawhin chet sualna thlenna hmun Balasore hi a hmunah tlawhin, hliam tuarte pawh damdawi inah a kan hlawm bawk.

CBI bakah Commissioner of Railway Safety (CRS) leh GRP, Balasore chuan chetsualna thlen dan hi an chhui ve bawk a ni. Report hmasaah chuan he chet sualna hi signal lam dik loh vanga thleng nia tarlan a ni.

Rel chet sualnaa thi, an nihna la hriat loh ruangte hi nimin aṭang khan AIIMS, Bhubaneswar chuan DNA sample an la ṭan tih official-te'n an sawi. Ruangte hi bawm pangaah dah ṭhat niin, thla ruk thleng vawn ṭhat rih a ni dawn tih a sawi bawk. Sample an lakte hi report hriat theihna atan hian ni 7-10 vel a ngai dawn a ni.