J&K inthlan tihkhawtlai vangin Omar Abdullah lungawi lo

Jammu and Kashmir Chief Minister hlui leh National Conference (NC) party hruaitu, Omar Abdullah chu J&K Assembly inthlan tihkhawtlai a nih avangin Election Commission chungah a lungawi lo.

Omar Abdullah chuan assembly inthlan buatsaih a nih loh chhan chu Election Commission chuan mipuite hnenah an sawifiah a ngai a ni tiin, "Inthlan hi kan dikna chanvo a ni. Jammu and Kashmir mipuite chanvo chhuhsak an nih avanga an lawm a nih chuan an duh ang chuan ti rawh se. Mahse, an hmaah hian kunin kan ngen ngai lo ang, keini pawh hian zahawmna kan nei ve a ni. Election Commission hian hei hi rawn ngaihven se la, election tihkhawtlai a nih chhan hi mipuite hrilh rawh se," tiin reporter-te'n an kawmnaah a sawi.

Election Commission hian inthlan neih tur a tihkhawtlai chhanah hian dangtu a nei em ni? tih zawtin, "Dangtu a nei a nih chuan Election Commission hian tlang takin a chhan hi sawi mai rawh se. A nih loh chuan an thiltih dan hi a rinhlehawm takzet a ni," a ti.

March thla khan National Conference, People's Democratic Party leh Congress ṭanghote chuan inthlan neih ngiatin Election Commission of India hruaitute an lo kawm tawh a ni.

Omar Abdullah hian a hmain BJP chu assembly inthlan huaihawt ngam loah a lo puh tawh bawk. Tripura, Nagaland leh Karnataka-ah inthlan neih a nih laiin J&K-ah inthlan nei ngam loa an tikhawtlai zel chu hnehna chan an inrin loh vang a ni, tiin a lo sawi tawh.