PM Modi sikul luhna hmasa ber inspirational centre-ah siam dawn

Prime minister Narendra Modi-a sikul luhna hmasa ber, Gujarat-a Mehsana district-a Vadnagar khuaa sikul chu ram chhunga zirlai dangte tana phurna leh chona siam thei tur model sikul, 'Prerna'-ah siam a ni dawn.

Prerna chu sikul ṭha bik, tawnhriat neihna tur sikul atana buatsaih an tum thu sorkar thupuangtute chuan an sawi. Khawl leh tihdan ṭha bik chi hrang hrang hmanga zirlaite chu zirtir an nih tur thu leh, nakkumah batch hmasa ber chu an pass chhuah tur thu an sawi a ni.

Ram chhunga district 750 chuang aṭangin, district tinah zirlai pahnih ṭheuh thlan chhuah an ni ang a, heng zirlaite hian Prerna-ah hian kar khat chhung hun an hmang thin ang. India chhulchhuak mi chhuanawm tak takte bakah, India ropuina chanchinte chu hmanrua leh tihdan ṭha ber ber hmanga uluk taka zirtir an ni dawn a ni. Prerna-ah hian classroom pariat a awm a, kum tluanin district 15 aṭangin zirlai 30 an awm reng thei dawn a ni.

Prime Minister Narendra Modi-a sikul luhna hmasa ber hi kum 2018 khan Archaeological Survey of India chuan thil hlu bik leh vawn ṭhat tur zingah a lo telh tawh a ni.