June ni 23-ah eptu party-te inhmu khawm dawn

Eptu party hrang hrang hruaitute chu June ni 23 hian Patna-ah an inhmu khawm dawn.

Meeting hi June ni 12-a neih tura ruahman a ni a, mahse hruaitu ṭhenkhat - Congress President, Mallikarjun Kharge, Rahul Gandhi leh DMK President MK Stalin-te'n programme dang an lo neih sa avangin an tel theih loh tur thu an sawi hnuah, June 23-a neih turin an sawn a ni.

Bihar Chief Minister leh Janata Dal (United) hruaitu, Nitish Kumar chuan eptu party hruaitute hi biain, meeting hun sawn a nih thu hi a hrilh hlawm a ni.

June ni 23-a meeting neih turah hian Congress President Kharge leh President hlui Rahul Gandhi-te chuan an tel theih tur thu an tichiang nghal. Anni bakah hian West Bengal Chief Minister Mamata Banerjee, Samajwadi Party chief Akhilesh Yadav, Jharkhand Chief Minister Hemant Soren, Maharashtra Chief Minister hlui Uddhav Thackeray, NCP chief Sharad Pawar, Tamil Nadu Chief Minister M.K. Stalin, Delhi Chief Minister Arvind Kejriwal, CPI General Secretary D. Raja, CPI (M) General Secretary Sitaram Yechury leh CPI (ML) General Secretary, Dipankar Bhattacharya-te chuan an tel thei dawn tih an sawi tawh bawk.

Eptu ṭangrual din a nih theihna atana hma latu, Bihar CM Nitish Kumar chuan eptu party hruaitute meeting hmasa ber turah hian party tina hruaitu lu berte ṭheuh an tel ngei a duh thu leh, chu chuan an rorela khaihlak leh thu inchuh awm theite a pumpelhtir theih bakah, rorel a tihawlsam a beisei thu a lo sawi tawh a ni.