Congress-in Prime Minister leh Railway Minister lakah FIR theh luh duh

Congress party chuan Balasore, Odisha-a rel chet sualna thleng chungchangah Prime Minister Narendra Modi kaihhruai sorkar chu Himalayan tlang dung chhehvela state-te a ngaihthah vang niin an puh.

Nilaini khan Congress chuan Central Bureau of Investigation (CBI) chu Prime Minister Narendra Modi leh Railway minister, Ashwini Vaishnaw lakah FIR theh lut tura an duh thu an sawi.

Congress thupuangtu Ajoy Kumar chuan," Rel kawng thar siamna tur leh a hlui thawm ṭhatna tur atan kum 2018-2019 ah Rs vbc 9,607 dah a nih laiin, kum 2019-2020 khan Rs vbc 7,417 crore chiah dah a ni thung. Kum li ral ta chhung khan rel kawng ṭhat loh avanga chetsualna hi vawi 1,129 a thleng a, heng chhiatnaa mawh la tu hi tumah an awm chuang si lo," tiin press conference an neihnaah a sawi.

Odisha-a rel chet sualna chungchang a sawinaah, Ajoy Kumar-a hian,"Rinhlelh tur an awm a, CBI-in chhui tur an nei a nih chuan Ashwini Vaishnaw hi a ni. He thil hi Railway Minister-in a thlentir luih, Prime Minister nena an ruahmanna vek a ni a, an lakah hian FIR theh luh tur a ni," a ti.

Congress President Mallikarjun Kharge pawhin hemi chungchangah hian,"Railway Minister fakna ringawt hian Odisha rel chet sualnaa chhiat tawk chhungkaw 288-te tan rorelna dik hmuh theih a ni lo. Minister-te'n mawh an lak ngam a, an tihtur dik tak an tih chauhin rorelna dik a awm chauh ang." a ti. "Modi-a sorkar hian kum kua teh meuh Railway Ministry hi a ngaihthah a, chumi avang chuan ramin a tuar mek a ni." tiin a twitter-ah a tarlang bawk.

Kharge chuan Prime Minister hnena lehkha a thawnah chuan, CBI hian rel chet sualna ni loin pawikhawihna leh misual hnu an chhui ṭhin tih a ziak tel bawk a ni.