Canada-a India zirlai 700 chuang thawn let leh mai theih dinhmunah an ding mek

Canada-a zirna chhunzawm tura kal, India mi, zirlai 700 chuang chuan harsatna tawkin, India rama thawn let mai theih dinhmunah an ding mek.

Heng zirlai 700 chuangte'n Jalandhar, Punjab-a agent pakhat hnen aṭanga Canada rama zirna chhunzawmna tura institution aṭanga admission tihna tur lehkha an hmuhte chu Canada ram an thlen hnuah a lem a ni tih hriatchhuah a ni.

Zirna ina admission tih theihna lehkha an dawnte a lem a ni tih hriatchhuah a nih hnuah, Canadian Border Security Agency (CBSA) chuan heng zirlaite hnenah India rama thawn kir an nih tur thu hriattirna a pe nghal a ni.

Zirlaite hian Canada immigration minister, Sean Fraser be pawpin, Fraser hian India zirlaite harsatna tawh chu a lo buaipui tur thu a lo hrilh.

Hetih lai hian, Punjab NRI Affairs Minister, Kuldip Singh Dhaliwal chuan External Affairs Minister (MEA), S. Jaishankar hnenah lehkha thawnin, Canada-a bum tawk zirlai mangang taka awmte chu ṭanpui tur leh an harsatnate chinfelsak vat turin a ngen. Thawn let an nih loh nan an visa neih mila work permit-te buaipuisak mai tura a duh thu a sawi.