Kolhapur buainain ziaawm lam pan

Tipu Sultan-a lem leh audio ngaihmawh theih tak social media-a upload a nih avanga Hindu sakhaw zuitute'n Kolhapur, Maharashtra-ah kawng zawha buaina an siam hnuah, nimin chawhnu lam khan boruak a ziaawm ṭan niin senior police official-te chuan an sawi.

Kolhapur Superintendent of Police, Mahendra Pandit chuan buaina a chhuah hnuah Nilaini tlai khan district guardian minister Deepak Kesarkar hoa peace committee neih a nih thu leh, hemi ni chawhnu lam khan boruak sosang zual chuan ziaawm lam a pan tawh thu a sawi. Dawrte an inhawng leh ṭan tawh a, mipuite pawhin khawlai an chhuak leh ngam tawh a ni, a ti.

Buaina chhuak kaihhnawihah hian mi 36 man an ni tawh a, thubuai siamsak nghal an ni bawk.

Police-te chuan social media-a Tipu Sultan-a lem leh audio ngaihmawh theih tak post chungchangah hian thubuai panga an ziak lut a, mi panga manin,an mi man zingah kum tling lo pakhat a tel.