Odisha sorkarin mitthite nihna hriat a nih theih nan a ṭhenawm state sorkarte puihna a ngen

Balasore, Odisha-a rel chetsualna rapthlak a thlen aṭanga kar khat dawn a ral hnuah pawh, he chetsualnaa thi zinga mi 82-te chu tunge an nih hriat theih a la ni lo.

Odisha sorkar chuan a ṭhenawm state - West Bengal, Bihar leh Jharkhand-a thuneitute be pawpin, tute nge an nih la hriat loh ruang an la kawlte chu a rang lama an nihna hriat a nih theih nana hmalakpui turin a ngen.

Bhubaneswar Municipal Corporation (BMC) commissioner, Vijay Amruta Kulange chuan,"Ruangte an rawn finfiah a, tunge an nih hriat a nih thuai theihna atan state dang sorkar official-te nen kan thawkho reng a ni," a ti. Railways leh AIIMS Bhubanewar-te nen pawh an thawhho vek thu a sawi bawk.

Chetsualna thlenga chhiat tawk chhungte ṭanpuina turin control room siam a ni a, ruang rawn la tura rawn kalte chu an ei tur leh, an riahna turte pawh an buatsaihsak vek tih Kulange chuan a sawi.

AIIMS Bhubaneswar chuan an institute-a ruang 162 an kawl zinga ruang 80 chu an chhungte hnenah hlan an ni tawh a, a dang 80 erawh chu tute nge an ni tih hriat a la ni lo tih a sawi. Hetih lai hian ruang inchuh hi an awm ṭhin avangin harsatna an tawk fo a, hei vang hian DNA sample lakte a ngai ṭhin a ni. AIIMS Bhubaneswar thuneitute chuan DNA sample 50 lak a ni tawh a, heng zinga sample 29 chu AIIMS Delhi-ah thawn a ni a, result pawh hriat thuai a ni ang, an ti. DNA report an dawn hunah, ruang inchuh awm pawh hi an chhungte dik tak hnenah an pe thei dawn tih an sawi a ni.