PM Modi-a'n BJP rorelna state-a CM-te kawm dawn

BJP chuan state assembly inthlan lo awm tur leh, 2024 Parliament inthlanpui neih tur puala Mission 2024 a kalpuina hnuaiah, June 11-12 hian Delhi-ah BJP sorkarna state chief minister leh minister-te meeting a ko.

He meeting hi prime minister Narendra Modi chuan a telpui dawn a, assembly leh Parliament inthlan neih tur atana an party agenda hrang hrangte zau zawka sawiho a ni ang. "BJP hian inthlan zawng zawng hi tihtak zetin a bei thin a, inthlan hmachhawn dan tura relte uluk takin kan zawm bawk ṭhin," tiin party senior member pakhat chuan a sawi.

BJP hian assembly inthlan hmabak - Madhya Pradesh, Rajasthan leh Telangana-ahte hneh taka sorkarna chan leh ngei an tum.

Meeting-ah hian BJP president JP Nadda bakah party kalphung siamtu pawimawh tak, Amit Shah leh national general secretary (Organization) BL Santhosh te, party chhunga general secretary hrang hrangte pawh tel tura rin an ni.

BJP rorelna state-a CM leh Deputy CM ṭheuhte'n mipui tan bika hamṭhatna siam, scheme leh sorkar laipui kaltlanga hmalakna an neih tawh dante report an pe bawk ang.