Congress-in MSP chungchanga loneitute bumah BJP sorkar a puh

Congress party chuan prime minister Narendra Modi kaihhruai sorkar laipui chu Minimum Support Price (MSP) chungchanga loneitute bumah a puh.

Ningania press conference an neihah, Congress general secretary Randeep Surjewal chuan PM Modi kaihhruai sorkarin loneitute tana MSP thar a puan chu a hminga siam ve satliah, a taka an kalpui si loh a ni tiin, MSP chu 'Maximum Suffering of the Producer'- ah an chhuah ta a ni, a ti.

Sorkar laipuiin kum 2023-2024 atana Kharif crop bikte MSP tur a puanzar aṭanga ni khat hnu lawkah Surjewal hian MSP an siam thar chu loneitute tan a beitham thu leh, sorkarin a leisak ṭhin tlemzia thu a sawi. Commission for Agricultural Costs and Prices-in ruahmanna a siam anga thlai hrang hranga MSP turte chu thlai thar a nih atanga zawrh a nih thlenga a buatsaihna man bakah 50% an hlep theihna tur a tiam hnuah pawh a tak taka an leisakna erawh chu aia tlem zawk fe a nih leh si thu tiin a sawi a ni.

Surjewala chuan, "An tiam zat MSP anga an leisak leh dawn si loh chuan MSP siam chu eng nge a ṭulna? Modi-a sorkar hian Kharif crop-te tan MSP hi a puang ve mai mai a ni, India-ah hian loneitute thlai thar hi MSP anga lei a ni tak tak ngai lo a, 50% pawh an hlep pha lo. Modi-a sorkar hi lo neitute hrehawmna sorkar a ni," a ti.

Congress president Mallikharjune Kharge pawhin, "Modi-a sorkar chuan ram chhunga loneitute hnenah thil pahnih a tiam a - 50% hlep an neih theihna tura MSP siam leh kum 2022-ah loneitute sum lakluh a leta tihpun a ni. Mahse heng an thutiamte hi dawtah an chang tawh. Kharif crop-a MSP-te an tihsan anga lei leh si loin, agriculture budget pawh an tihniam hial zawk a ni," tiin a twitter-ah a tarlang ve bawk. Kum kaw chhung Modi kaihhruai sorkar ding tawh chu India rama loneitu mi vaibelchhe 62-te tan chuan anchhia a ni, tiin a sawi.