Congress-in India leiba Rs. vbc nuai 155-in a pung tih an sawi

Congress party chuan Prime Minister Narendra Modi kaihhruai sorkar kum kua a din chhungin India ram leiba chu a let thum, Rs. vbc nuai 155 in a pung hman tih a sawi a, India ram economy dinhmun dik tak tarlanna turin sorkar laipui chu hemi chungchang bik zirchianna report, white paper tichhuak turin an phut.

Kar liam ta Inrinnia press conference a neihah, Congress thupangtu Supriya Shrinate chuan,"Gujarat CM a nih lai chuan Modi-a hian a lam ṭang lote chu hnathawk ṭha lo, hnathawk thiam lo leh eiru angah puh vekin, chu chu vawiina amah leh a sorkar nihna chiah a ni tawh zawk," tiin a sawi. "India economy ṭha chho mek kha tichhiain, thil man a san chhoh zel bakah, hna nei lo an pung bawk. Modi-a hian kan ngaihtuah phak bakin hna a thawk a, India chu dinhmun hlauhawm takah dahin, leiba pawh Rs. vbc nuai 100 zetin a puntir ta a ni," a ti.

Congress hruaitu hian kum 2014-a India leiba Rs. vbc nuai 55 chu tunah Rs vbc nuai 155 a chuang tawh a ni, a ti. Kum 67 chhungin Prime Minister 14-te hnuaiah leiba hi Rs. vbc nuai 55 a nih theih laiin, Modi-a sorkar hian Rs. vbc nuai 100 leiba a neih belh a ni, tiin a sawi.

"Chanchinthar lama langsar nih thiam viau leh economy siam thiam hi thil hrang daih a ni a, technology hman thiam viau leh Whatsapp khawih thiam viauin kawngro a su lo a ni. Congress chuan kan economy dinhmun dik tak zir chianna white paper kan phut a, a chhan chu kan dinhmun hi thuk takin a chhe tawh a ni," a ti.