India-in mihring tam vangin sik leh sa danglam tuar nasa bik thei

United Nations Environment Programme (UNEP) Executive Director, Erik Solheim chuan India chu mihring tam lutuk avanga sik leh sa inthlak danglam tuar nasa bik thei dinhmunah a din thu a sawi.

G20 forum pakhat, Youth 20 (Y20) in sik leh sa inthlak tiziaawm tura hmalak dan sawihona a buatsaihah Solheim hian he thu hi sawiin,"Khawvel pumah sik leh sa inthlak hi an tuar vek a, mahse, India-ah hian mihring cheng an tam em avang leh India nihphung hian a ken tel tlat avangin sik leh sa inthlak hi an tuar na bik dawn a ni." a ti.

"India hmar lama khawpui, Delhi angah te chuan boruak bawlhhlawh hi a nasa em em a, hmun dang zawng aiin a nasa a ni. India leh America hian ramngaw leh nungchate hloh nasa hle mah se, India dinhmun hi a tha lo zawk a ni," tiin a sawi.

Solheim chuan,"Kum danga tun ang hun ngaihtuahin khawvel hi a lum sawt hle a, ram hrang hrangte dinhmun thlirin nikumah Pakistan-ah tui a lian a, America leh Europe-ah ram kang nasa tak an tuar. China-ah pawh nikum hmasaah tui lian nasa tak an tuar a, nikumah khua a kheng leh bawk a, sik leh sa danglam hi mi zawng zawngin kan tuar a ni" tiin a sawi. Khawvel pumpui hian China anga engkim electric hmanga tih kan tum a ṭul thu leh, chu chuan kan environment a chhanhim theih thu a sawi. China hi ni leh thli chakna hman ṭangkai kawnga a ber an nih thu leh, nikuma China-a car hralh pali atanga pakhat zel chu electric car a nih thu te, electric bus an hman deuh vek tawh thu leh ram dang pawhin an entawn a ṭul thu a sawi a ni.

India pawhin electric bus hi hmang ve ṭanin, khawpui 27-ah metro system an hmang tawh a ni.