Muslim tana reservation siam hi India danpui kalh a ni - Amit Shah

Union Home Minister Amit Shah chuan Maharashtra-a thu a sawiah, Muslim tana reservation siam chu India danpui kalh a nih thu a sawi.

Inrinni khan BJP sorkarin kum kua an tlin lawmna, Maharashtra-a Nanded hmuna vantlang inkhawm an buatsaihah Amit Shah hian thu sawiin, "BJP chuan Muslim tana reservation siam hi kan do tlat a. Sakhaw denchhena reservation siam hi a awm turah kan ngai lo," a ti.

Amit Shah thusawi hun hian ngaimawh a hlawh hle a, tun hnai lawkah Maharashtra-a sakhaw pahnih inkara inbeihna a thlen bakah, Maharashtra thenawm state Karnataka-ah inthlan hma chiaha BJP sorkarin Muslim tana quota siamna dan a lo ṭhiah ve chiah bawk a ni.

Maharashtra-a BJP thawhpui ṭhin, Shiv Sena party phel chungchangah an hotupa Uddhav Thackeray tielin,"Shiv Sainiks dik takte chuan chhuahsan che uin kan bulah an lo kal a, in thiltih dan leh kal dan an ning tawh a ni. Shiv Sena dik takte chu kan hre vek, anni chuan chhinchhiahna dik tak, thal leh a mu pawh an hman hi," tiin Shah chuan a sawi.

Amit Shah hian Congress hotu, Rahul Gandhi pawh bei telin,"Rahul-a hian ram danga kal a, chuta ṭanga sorkar sawisel hi engati nge nuam a tih em em? Helaiah chuan tumahin a thusawi an ngaihthlak duh loh vang a ni mahna. Modiji-a chu khawi hmunah pawh lawm leh ngaihsak a hlawh a ni," a ti. Modi-a chu India hmel lanna leh India chhuanvawr a ni tiin, Prime Minister vang hian India-in kawng tinrengin hma a sawn phah a ni, a ti.