US Congress-ah PM Modi-a'n thu a sawi leh dawn

US president Joe Biden leh First Lady Jill Biden-te sawmna angin, Prime Minister Narendra Modi chu June 21-24 chhung hian US-ah a zin dawn.

US-a a cham chhungin Prime Minister Modi hian House of Representative leh Senate-in joint session an neihah thu a sawi dawn a, hei hi US Congress joint session-a thu a sawi ṭum hnihna tur niin, India Prime Minister zinga joint session-a vawi hnih thu sawi thei awm chhun a ni ang.

White House aṭanga zin tura sawmna a dawnah hian US President leh First Lady-te chuan Modi-a hi an fak hle a, kum sarih kal taa US Congress-a a thusawite chuan India leh US inkar a tinghet zual hle tih an sawi. Tun ṭuma a zin leh tur pawh hi ram pahnihte inkar ṭhatzia lantirna atan a pawimawh dawn hle tih an sawi bawk.

PM Modi-a pawhin US duhsakna a dawn avangin lawmthu a sawi a, US Congress joint session-a thu a sawi tur chu a nghahhlelh tawh thu a sawi.

Modi-a'n US a tlawh tur denchhen hian state hrang hrang 20-a India mi awmte chuan a hmuahna hun lo buatsaih an tum a, June ni 18 hian 'India Unity March' an nei dawn a ni. June ni 21-ah White House hmaah India hmasawnna leh ṭhan nasat dan entirna hun, cultural event buatsaih a ni bawk ang.

Prime Minister zinna tur atan hian ram pahnihte chuan inbuatsaihna an kalpui mek a, US secretary of defence Lloyd J Austin chuan June ni 4-5 khan India a rawn tlawh a, vawiin hian US Natioal Security Advisor Jake Sullivan chu India-ah a rawn kal leh dawn bawk a, PM Modi zinna tura security kalpui dan chungchangte a rawn buaipui dawn a ni.