IAF-in ram hrang hrangte telna aerial exercise a huaihawt dawn

India Air Force (IAF) chuan kumin kum tawp lamah hian India ram khawthlang lama thlaler hmunah ram hrang hrangte telna aerial exercise huaihawt a tum. He aerial exercise-ah hian US telin, ram 10 atanga 12 vel tel tura beisei a ni.

Thlalera aeriel exercise neih tur hi India-in a huaihawt tawha lian leh ropui ber tura beisei a ni a, van boruakah air force-te tan thiltih harsa tak takte tihchhin an tum dawn bakah, a tel tur ramte atangin aircraft tam tham tak an rawn thawh chhuahpui tura rin a ni bawk.

Exercise neih turah hian India chuan a combat aircraft neih ṭhat ber, Rafale a thawh chhuahpui dawn a, chu bakah chuan India-in a hman thiam Sukhoi-30 ho pawh an tel ang.

IAF hian France rama multinational exercise, Orion neih zawh takah pawh Rafale aircraft a tir a, Rafale pilot hmeichhe awm chhun, Flight Lieutenant, Shivangi Singh pawh a tel a ni. Singh chuan a tana tawnhriat ropui tak a nih thu a sawi. A pilot pui, flight lieutenant Xavier pawhin, India pilot-te chet dan chu ram dang pilot-te aia a nep bik lohzia leh, pilot dangte ang thoa an chet ṭhat thu a sawi ve bawk.

He multinational exercise-ah hian NATO ram hrang hrang air force bakah, US, UK leh France ramte air force pawh an tel bawk a ni.