Whatsapp profile picture-a Aurangzeb-a thlalak hman vangin man

Mumbai police-te chuan Navi Mumbai-a mobile phone servicing centre-a thawk, mipa pakhat chu a Whatsapp profile picture atana Aurangzeb-a thlalak a hman avangin an man.

Police-te hian complaint thehlut behchhanin, IPC section 298 (sakhaw dang zuitute rilru tihnat tum zawnga thil ti) leh 153-A (sakhua, pianna hmun, chenna leh chi denchhena inhuatna tuh thei zawnga chetna) hnuaiah thubuai an ziak lut. An mi man hi a hming leh nihna puanzar a ni lo a, zawhna an zawh hnuah an chhuah leh rih tih sawiin, he case kaihhnawihah hian midang man an la neih loh thu police-te chuan an sawi bawk.

Police-te sawi dan chuan mi pakhatin a Whatsapp profile picture atana Aurangzeb-a thlalak a hmanna hi Hindu pawl pakhata tel, Amarjeet Surve chuan a screenshot lo hmuin, Navi Mumbai-a Vashi police station-ah complaint a theh lut a ni. Amarjeet Surve hian, ka screenshot dawnah a number a lan tel avangin state chhunga tunhnai boruakte hrilh pahin a Whatsapp profile picture chu thlak turin ka ti a, a thlak tur thu a sawi hnuah pawh a la thlak mai loh avangin complaint ka theh lut ta a ni, a ti.

Tunhnai lawk khan Maharashtra-ah hian social media-a Aurangzeb leh Tipu Sultan-a thlalak post a nih avangin Kolhapur khuaah buaina a chhuak a, he thil thleng vang boruak a la rip hle a ni.