CoWin data chungchangah Congress-in zir chianna neih phut

Congress party chuan Thawhtanni khan thuchhuah siamin, sorkar laipui siam CoWin platform atanga CoWin hmangtute data leak out a awm nia sawi chu eng ang chiaha India mipui, mimal nun tana hlauhawm thei nge a nih tih zir chianna neih an phut a, a zir chiang tur hian sorkarin thu a neih lohna, court sang zawk inrawlh a phut bawk.

Congress General Secretary (Communications), Jairam Ramesh chuan sorkar laipuiin heng data leak chungchangah hian India mi, nuai tam takte mimal thil a him theih nan eng nge a tih tawh tiin a zawt. Party General Secretary (Organisaton), KC Venugopal pawhin thil dang zawng aia sorkarin a tih tur hmasa ber chu mimal himna ngaihtuah a ni tiin, he mawhphurna hian palh a awm lohna atan mamawh tawh loh mimal data tihchhiat leh thai bo pawh a keng tel a ni, tiin a sawi.

CoWin data leak nia sawi chungchangah hian Union Minister of State for Electronics and Technology, Rajeev Chandrashekhar chuan,"CoWin application emaw website-a mimal data-te hi direct taka lak chhuah niin a lang lo," a ti.

Jairam Ramesh chuan Union Minister chhanna hi a duhkhawp loh thu a sawi. Mimal data lak chhuah theih maia a awm chu sorkar lam thiam loh a ni tiin, CoWin-a data-te vawn ṭhat a ni tawk lo a, security ṭha tak nena encrypt ni se chuan Telegram bot mai mai ni lo, a hmang thei mi tlemte chauhin an en thei tur a ni, a ti. "Kan Minister, technology lawm tak hian Whatsapp vela thu thawn darh mai mai lo hian press conference koin, he CoWin aṭanga India mipui tam tak data leak chungchanga hmalak an tum dan sawi fiah vat rawh se," tiin a sawi zui bawk.

CoWin hi sorkar laipuiin Covid-19 vaccine late chhinchhiahna atan leh certificate pek chhuahna atan a hmang a ni. CoWin hi vaccine lak hun tur emaw lak duh hun te hriatna atan te, vaccine la tawh tih hriatna certificate siamna atan te hman niin; Hetiang ti tur hian Aadhar card bakah, mimal leh chhungkaw ID hrang hrang hmangtein in-register ṭhin a ni a, heng mimal data-te hi CoWin Application Programming Interface hmangin, mi tute'n emaw Telegram bot kaltlangin an la chhuak thei ni a hriat a ni.

Hetih lai hian sorkar laipui thuchhuah chuan,CoWin platform aṭanga data leak an tih hi thu thang mai mai, a dikna hriat tur awm lo a nih thu a tarlang. Health Ministry enkawl CoWin portal hi a him tawk a, data-te vawnhim a nih theihna atan security pawh a ṭha tawk a ni , a ti ve thung.