India sorkarin Twitter a vau ṭhin tih Twitter CEO hluiin a sawi

Youtube channel, Breaking Points-in June ni 12-a an kawmnaah, Twitter CEO hlui Jack Dorsey chuan India rama loneitute'n Farm Law duh lohna lantira nawrh an huaihawt lai khan India sorkar chuan Twitter a vau ṭhin tih a sawi.

Dorsey hian Twitter-in India leh China-ah chhan hrang hrang avanga nawrna a dawn nasat ṭhin thu sawiin; loneitute nawrh an huaihawt chungchangah khan sorkar chuan post la thla tur leh,mimal information a dil nasat thu a sawi. A bikin sorkar laipui sawiseltu journalist-te chungchang pawh Twitter-ah hian dil a ngah a ni, a ti.

India sorkarin a thil ngen leh dil thinte chu Twitter policy kalh a nih avangin engmah an pek ngai loh thu a sawi a, " An duh anga kan tih loh avangin Twitter chu India rama tihtawpah min vau a, kan hnathawkte chu an chenna ina kal chilh bakah, kan office min kharsak thlengin min vau ṭhin a ni," a ti. India ram chu an market ṭha tak a nih thu leh, democracy ram ni si a an thil tih dan chu mak a tih thu a sawi bawk.

Union Minister of State for Electronics and Information Technology, Rajeev Chandrasekhar chuan Twitter CEO hlui thusawi hi chhangin, dawt a nih thu leh Dorsey chu a hunlaia Twitter hmingchhiatna thup a tum vanga sawi mai mai niin a puh ve thung.

"Twitter hian India dan chu zawm harsa a ti a, a bawhchhe fo bawk a ni. Dorsey hunlai hian Twitter hian India zahna a tlachham zual. A nihna takah chuan kum 2020-2022 chhung khan India dan an zawm thei miah lo a, 2022 June aṭangin dan angin thil an ti ve duh chauh zawk a ni," tiin a sawi.

Rajeev hian Dorsey-a'n India a puhna hi phain, tumah man an awm lo a, tumah an ina kal chilh lah an awm lo a, Twitter lah tihtawp a ni bawk lo, a ti.