Chhiatna thleng thei laka invenna siam turin state-te hriattir

Union Home Minister Amit Shah chuan Nilaini khan disaster management chungchangah state hrang hrang minister-te meeting a neihpui.

Meeting-ah hian Amit Shah chuan chhiatna thleng thei hrang hranga invenna leh inbuatsaihna bakah, chhanchhuahna hna thawh kawnga hmasawn zel turin state-te chu a fuih a ni. Nuclear plant thar din a nihna tur state pasarihte hnenah ngenna siamin, National Disaster Management Plant (NDMA) nena thawk dun chunga nulcear plant-a chhiatna thleng laka invenna leh chhanchhuah hna thawh dan tur ruahmanna mumal taka nei vek turin a hriattir.

Union Minister chuan disaster management atan Rs. vbc 8,000 ruahman a nih thu sawiin, Rs vbc 5,000 chu state-te tan fire service tihlen leh tihchangtlunna tura dah a ni, a ti. Metro city pasarihte tan urban flooding tihziaawmna turin Rs. vbc 2,500 dah a nih thu a sawi a, leimin avanga chhiatna tihtlemna tura hmalakna atan state leh UT 17-te tan Rs. vbc 825 dah a nih thu a sawi bawk.

Amit Shah chuan state 23-ah khaw lum vanga harsatna sutkian dan tur ngaihtuaha workshop neih a nih thu sawiin, state ṭhenkhatin loneitute tana chhawmdawlna pe tura ngenna an siam pawh ngaihtuah a nih tur thu te a sawi a, state-te pawh hemi huanga budget tipung turin a ngen nghal bawk a ni.

State zawng zawngte chu Model Fire Bill siam vek tur leh, ram pumah kaldan inanga kalpui turin a ngen a, District Disaster Management Plan chu state pariat-a district 87-ah tihkhawtlai a la ni a, peih thuai turin a ti bawk a ni.