Khadi product hralh chhuah a pung nasa

India rama Khadi sector chuan nasa taka hma sawn chhoin, Khadi and Village Industries Commission (KVIC) hnuaia thil siam, kut tah thuamhnaw an hralh chhuah chu kum kua chhungin 332% in a pung a, heng aṭanga sum lak luh zawng zawng hi Rs. vbc nuai 1.34 a tling.

Micro, Small and Medium Enterprises Ministry sawi danin, Khadi sector hian eizawnna a siam belh nasa hle a, a bik takin thingtlang leh mi hnuaihnung anga sawite zingah eizawnna atana hmang an tam hle. KVIC hian thingtlang lamah mi 9,54,899 tan hna a siamsak a ni, a ti.

Khadi hian India ram chauh ni lo, khawvel huap pawhin ngaihhlut a hlawh thar hle a, a sum lak luh punna atangin hei hi a hriat theih a ni. Kum 2013-2013 financial year-a Rs. vbc 31,154 a lak luh laiin, kum 2022-2023 financial year-ah chuan Rs. vbc 1,34,630 a la lut a ni.

A siam dan phung a felfai avang leh, natural fibre hman a nih bakah, kut themthiam thil danglam bik ngai a nih avangin Khadi hian hriat a hlawh a, sorkar hmalaknain ram danga thawn chhuah pawh a pung nasa a ni. KVIC Chairman, Manoj Kumar chuan,"Khadi product-te chuan khawvel huap pawhin rin a hlawh tawh. Kum 2013-2014 financial year aṭanga chhuta kum 2022-2023 financial year thlenga KVI product-te 268% laia a pung leh 332% lai maia hralhna a pung hi thil hralh chhuah kawnga la thleng ngai lo a ni," a ti.