ED-in Tamil Nadu Minister an man

Enforcement Directorate (ED) chuan nimin zing khan Tamil Nadu Electricity Minister, V. Senthilbalaji-a chu pawisa chheprelha puh chungchangah an man.

ED team hian Senthilbalaji hi Chennai-a a chenna inah darkar 18 zet thu an zawh fiah hnuah nimin zing khan an man a ni. Man a nih hma hian state secretariat-a a official chamber leh a chenna in bakah Karur leh Coimbatore vela a khawsak ṭhinnate an dap bawk.

Man a nih hnu lawkah Senthilbalaji hian a awm na a tih avangin zing dar 2 vel khan Omandurar Estate-a Sorkar Multi Super Speciality Hospital-ah check-up nei tura hruai nghal a ni a, hetah hian document phur motor pathumin an zui tel bawk. Hospital-ah hian Tamil Nadu Minister ṭhenkhatte'n tlawh nghalin, Minister Sekar Babu chuan Senthilbalaji hi nikhaw hre loa a awm thu leh ICU-a enkawl a nih thu a sawi.

ED hian report an ziah luh hnuah pawh Senthilbalaji man leh a chenna in dapsak a nih chungchangah official-in thuchhuah engmah an la siam lo.

Senthilbalaji man a nihna chhan hi kum 2011-2015 chhunga Senthilbalaji-a Transport Minister a nih laia Metropolitan Transport Corporation hnuaia hna lak tur atana thamna sum dawng leh, a thamna dawnte chheprelha puh chungchang nia sawi a ni. Supreme Court chuan he thil thleng chhui zuina tura phalna chu thla hmasa khan a lo pe tawh a ni.