Cyclone Biparjoy tleh tur atan Gujarat inralring

Cyclone Biparjoy chu vawiin tlai lamah hian Gujarat-a Saurashtra leh Kutch chhehvel bakah, Pakistan ramri hnaiah tleh tura rin a ni a, thlipui tleh tur atan hian Gujarat chu a lo inralring lawk hle.

Thlipui hi125-135 kmph a chaka tlehin, a nat lai berin 150 a kmph a thleng thei dawn niin Ahmedabad IMD director, Manorama Mohanty chuan a sawi. IMD hian Saurashtra leh Kutch district-ah red alert a tichhuak a, NDRF leh SDRF team eng emaw zat chu inralring tura hriattir an ni. Army-te pawh NDRF leh SDRF te pui thei turin an inring reng a, civil administration lam nen pawh ruahmanna chi hrang hrang an siam tawh bawk a ni.

Nimin khan thuneitute chuan thlipui tlehna bial tur nia sawia cheng, mi 37,800 chu hmun him lama an awm lailawkna tura siamah an sawn chhuak. Devbhumi Dwarka, Rajkot, Jamnagar, Junagadh, Porbandar, Gir Somnath, Morbi leh Valsad hmunah te NDRF team 17 leh SDRF team 12-te chu dah lawk an ni bawk.

Union Home Minister Amit Shah chuan nimin khan Gujarat CM, Bhupendra Patel leh state official dangte chu thlipui tleh tur chungchanga an inbuatsaih dante enpuiin, virtual meeting a neihpui. Shah chuan Gujarat sorkar chu mihring sawn chhuak zung zung thei tur leh mamawh hmasa, kawlphetha, inbiakpawhna lam chi, tui thianghlim in tur leh dam lo enkawlna tur hmunte ngaipawimawh zual turin a hrilh.