UCC chungchangah mipui leh sakhaw pawl ngaihdan la dawn
Law Commission chuan sawisel leh beih hlawh tak, Uniform Civil Code hman tum chungchangah he danin a nghawng nasat tur, vantlang mipui leh sakhaw pawl ṭhenkhatte ngaihdan lakna tur a buaipui leh ṭan.
August 2018-a term tawp ta, 21st Law Commission khan mipui leh sakhaw pawl ngaihdante zir chianna hi ṭum hnih a lo nei tawh a; consultation paper "Reforms of Family Law' tih pawh a lo chhuah tawh a ni.
Law Commission panel-in Nilainia thuchhuah a siamah, he consultation paper a chhuah hnu hian kum thum aia tam hun a ral leh tawh a, UCC pawimawhna leh a ṭulnate, court order-te ngaihtuahin bul ṭan ṭhat leh ngaia an hriat thu leh, zir chianna neih ṭhat leh chu thil ṭul a nih thu a sawi. 22nd Law Commission of India chuan UCC chungchanga mipuite leh sakhaw pawl ṭhenkhatte ngaihdan lak leh, UCC chungchanga an dinna hriat tuma hma la turin thutlukna an siam a ni, a ti.
22nd Law Commission hi kum thum atan an term pawhseisak an ni a, June 2016-a Ministry of Law and Justice in a hriattir anga UCC hman chungchanga hriat ngai leh hmalakna turte an bawhzui nghal a ni. Mimal ngaihdan sawi duh tan Law Commission chuan notice chhuah aṭanga ni 30 chhung hun an hawn thu a tarlang.
UCC hman hi BJP-in inthlanpui neih dawna an thutiam zinga mi a ni a, tun hnaia Karnataka assembly inthlan neih a nih dawn pawh khan an thutiam zingah an telh leh a ni.
Law Minister hlui, Kiren Rijiju chuan December 2022 khan Rajya Sabha-a ziaka zawhna a chhannaah mimal nunphunga tel, inneih, ro khawm leh inṭhen chungchanga dan inang tlang siam tur hian state-in thuneihna a nei a, India danpuia article 44-naa Directive Principles of State Policy hnuaiah chuan India ram chhunga chengte tan state-in dan inang tlang hman tur a siam ang tia a inziah thu a sawi.
Uniform Civil Code-in a tum ber chu India mi zawng zawngin sakhaw behchhan nei loa ram puma dan inang vek hman theih a ni. Mimalin ama nuna tihdan hrang hrang a neih theih thil, ro khawm chungchang bakah, fa lak leh dinhmun luahtu thlenga dan mumal zawk siam a tum a ni.