Delhi Police-in WFI hotu lakah chargesheet theh lut

Wrestling Federation of India (WFI) hotu leh BJP MP ni lai, Brij Bhushan Sharan Singh chu hmeichhe wrestler ṭhenkhat laka mipat hmeichhiat lam hawia mawi lo taka chea puh chungchang, nimin khan Delhi police chuan charge sheet an theh lut.

Delho police chuan WFI hotu an puhna chungchang chhuitu, Special Investigation Team (SIT) chuan mi 180 chuang thu an zawt fiah a, FIR pawh pahnih an theh lut tih an sawi. Ram dang wrestling federation panga hnenah wrestler-te khawsak ṭhinna leh tournament an neihna hmuna cctv footage emaw, thlalak leh video engpawh, Singh-a inhnamhnawihna nia an hriat an neihte pe turin an dil thu an sawi bawk.

Police-te hian an thil chhuina kal zelah, Zirtawpni khan WFI office-ah hmeichhe khuaikhem tawk nia sawi zinga pakhat chu hruaiin, darkar chanve thu zawtin, khuaikhem a tawh laia thil thlen dante an sawitir. Wrestler hi hmeichhe police officer eng emaw zatin an kalpui a ni.

April ni 21 khan Singh chu hmeichher wrestler-te chunga mawi lo taka chea puhin, hmeichhe wrestler pasarih chuan complaint an theh lut a, a khawih zinga pakhat phei chu kum tling lo niin an sawi bawk. Wrestler-te hian Singh hi WFI hotu a nihna aṭanga ban leh, hremna pek phutin hun rei tak nawrh an huaihawt tawh.

Union Sports Minister Anurag Thakur chuan kar hmasa khan wrestler-te aiawh hian Olympic-a medal lo dawng tawhtu, Bajrang Punia leh Sakshi Malik-te kawmin, June ni 15 ral hmain he case-ah hian chargesheet theh luh a nih tur thu a tiam a ni.