Canada-a India zirlai bum tawkte dinhmun zir chiang leh phawt dawn

Canada sorkar chuan an rama India zirlai, certificate lem hmanga bumte hriat chhuah a nih hnua thawn haw tura a tihte dinhmun a zir chiang leh phawt dawn.

India zirlaite'n kawng zawha an ngen angin, an chungchang ngaihtuah rih a nih tur thu leh, tun maiah chuan thawn haw an nih loh tur thu Canada sorkar chuan a sawi.

Canada Immigration Minister Sean Fraser chuan he thu hi Nilaini khan puangin,"Zirlaite a mal mala zir chianga ṭanpui thei tur task force kan din a ni. Ram dang aṭanga Canada-a lehkha zir tur tak taka lo kal, bum an nih avanga harsatna tawkte chu Canada-a an awm chhunzawm phalsak an ni ang. Inbumnaa tel ve nia kan hriat an awm a nih erawh chuan Canada dan hnuaiah na taka hrem an ni ang", a ti.

Canada Border Services Agency chuan India aṭanga kal zirlai 700 te'n university admission an hmuhna lehkhate chu a lem a ni tih an hriat chhuah hnuah India rama thawn haw tur tiin thuchhuah an siam a ni.