Cyclone Biparjoy vangin Gujarat-a khaw 940-ah kawlphetha nei lo

Cyclone Biparjoy chu Gujarat-a Kutch leh tuipui kam velah Ningani tlai dar 6:30 vel khan darkar khata km 140-a nain a tleh a; thli leh ruah nasa taka thawkin chhiatna a thlenah mi pahnih an thi a, hliam tuar mi 22 vel an awm bawk.

Thlipui tleh hian electric ban 300 leh thingkung 524 chuang a chhem tlu a, hmun hniam lama awm khaw eng emaw zat chu tuiin a chim bawk. Thingtlang khua 940 chuan kawlphetha an nei lo.

Gujarat Relief Commissioner, Alok Singh chuan,"Thli tleh avang hian mi 22 vel hliam tuar awmin, mi pahnih an thi tawh. Ran thi hi kan hriat chinah 23 an awm a, hmun tam takah electric ban a chhiat avangin khaw 940-ah chuan eng an nei lo a ni," a ti.

Cyclone Biparjoy vang hian Gujarat Jamnagar airport-a sumdawnna lam reng reng chu nimin thleng khan khar a ni. Airport thuneitute chuan tuialhthei hman ngai chi reng reng chu tihtawp a nih thu an sawi. Sangha man leh lawng chawlhna hmun pawh chawlhtir niin, tuipuiah lawng pawh chhuahtir an ni lo. Gujarat paltlang rel pawh eng emaw zat chawlhtir an ni bawk.

Tuipui kam leh hmun hniam laia khawsa mi 94,000 chu hmun him lama sawn chhuah an ni tawh. National Disaster Response Force team 18, State Disaster Response Force team 12 bakah state road and building department team 115 leh state electricity department team 397 te chu tuipui kam district hrang hranga chhanchhuah hna thawk tura an awm thu Gujarat sorkar chuan a tarlang.

Prime Minister Narendra Modi pawhin Gujarat Chief Minister Bhupendra Patel chu phone-a biain an state dinhmunte a sawipui a, Gir forest-a ramsate dinhmun leh an himna tura ruahmanna siamte a zawt bawk.

Nimin khan thlipui hian Rajasthan-a Jodhpur, Jaisalmer, Pali leh Sirohi lam a pan a, a nat lam erawh a ziaawm deuh tawh a ni. Vawiin hian thli leh ruah thawk tura rin a ni tih IMD Director General, Dr. Mrutyunjay Mohapatra chuan a sawi.